श्री शिवशक्ती सेवा मंडळ काशीगांव या संस्थेची स्थापना सन 1984 साली झाली. संस्थेची ध्येय- धोरणे हि मुळातच समाजसेवा, शिक्षण ,आरोग्य हे घटक समोर ठेवून निश्चित करण्यात आली. संस्था सुरु झाल्यानंतर अनेक आरोग्य शिबीरे, वृक्षारोपण, सार्वजनिक विवाह सोहळे, सार्वजनिक गणेशोत्सव, गोपाळकाला, विविध क्रीडा स्पर्धा, गुणवंत गौरव सोहळा अशी अनेक सामाजिक कार्ये संस्थेने आयोजीत केली. हे करीत असतानाच जवळपासच्या परिसरात माध्यमिक शाळा नाही तसेच चेना, काजूपाडा या परिसरातील आदिवासी विद्यार्थ्यांचाही नेटाने विचार करीत शाळा सुरू करण्याचा विचार संस्थेचे अध्यक्ष माननीय श्री. केसरीनाथ डोंगरनाथ म्हात्रे यांनी केला. मनपा शाळेचे माजी मुख्याध्यापक ,आणि संस्थेचे उपाध्यक्ष स्व. बांदवडकर गुरुजी व संस्थेच्या सचिव सौ.स्वाती जोशी यांच्या सहकार्याने शाळेचा श्री गणेशा झाला.

                    “आदर्श विद्या निकेतन” या शाळेच्या स्थापनेने पदाधिकाऱ्यांनी पाहिलेल्या स्वप्नाला मूर्त स्वरूप आले. श्री शिवशक्ती सेवा मंडळाच्या माध्यमातून आदर्श विद्या निकेतन या शाळेचा प्रस्ताव सन 1997-98 मध्ये शासनाकडे सादर झाला. व सन 1999 साली शाळेला मान्यता मिळाली. त्यानुसार शाळेचे वर्ग बालवाडी, इयत्ता 1 ली ते 4 थी व इयत्ता 8 वी पासूनचे वर्ग सुरु करण्यात आले. शैक्षणिक वर्ष 2000-2001 पासून शाळेला नैसर्गिक वाढीने इयत्ता 10 वि च्या वर्गास परवानगी मिळून इंडेक्स नंबर प्राप्त झाला. अवघ्या काही विदयार्थ्यांसह 25 वर्षांपूर्वी सुरु झालेल्या विद्यालयात आज दीड हजाराहून अधिक विदयार्थी शिक्षण घेत आहेत. विद्यालयातील अनेक गुणवंत शिक्षकांना विविध पुरस्कारांनी सन्मानित करण्यात आले आहे. आधुनिक प्रसार माध्यमातूनही आमच्या विद्यालयातील शिक्षक विदयार्थ्यांना मार्गदर्शन करत आहेत. अनेक नामवंत माजी विदयार्थ्यांची परंपरा विद्यालयाला लाभली आहे.